इलाम । रोयल स्पोर्टिङ क्लव दमक झापालाई टाईब्रेकरमा हराउँदै दिपेन्द्र शिखर फुटबल क्लव इलाम १५औं पवित्रहाङमा गोल्ड कप अन्तर्राष्ट्रिय महिला फुटबल प्रतियोगिताको फाइनलमा प्रवेश गरेको छ ।
इलामको माङसेबुङ गाउँपालिका–५ स्थित आत्मानन्द रंगशालामा बुधबार भएको दोस्रोे सेमिफाइनल खेलमा रोयल स्पोर्टिङ क्लब दमकलाई टाईब्रेकरमा ५–४ गोल अन्तरले पराजित गर्दै दिपेन्द्र शिखर इलाम फाइनलमा प्रवेश गरेको हो ।
टाईब्रेकरमा इलामका सजिना कोइराला, रेविका पाण्डे, सोस्तिमा विक, शिमा घले र आशिका राईले गोल गरे । यसैगरी दमकका मनिषा चौधरी, अविका लावती, रेजिता मगर र कमला श्रेष्ठले गोल गरिन् भने विपासा धिमालको प्रहार इलामका गोल रक्षक भरना नगरकोटीले विफल पारिन ।
खेलको प्लेयर अफ द म्याच दमककी कमला श्रेष्ठ घोषित भईन । उनले नगद तीन हजार ६९ रुपैयाँ हात पारिन् ।
खेलको निर्धारित समयमा १-१ गोलको बराबरीमा सकिए पछि नतिजा टाईब्रेकरमा धकेलिएको हो । टाईब्रेकरमा इलाम भाग्यमानी सावित भयो ।
पहिलो हाफ गोलरहित बराबरीमा सकिएको खेलको दोस्रो हाफमा भने ५६औं भिनेटमा आसिका कार्कीको गोलमा रोयल दमकले सुरुवाती अग्रता लिएको थियो । तर ६५औं मिनेटमा सजिना कोइरालाले फ्रिकिक्बाट गोल गर्दै इलामलाई बराबरीमा फर्काएकी थिइन् ।
यस अघि दुवै टोलीबाट गोल गर्ने थुप्रै अवसरहरु प्राप्त गरेपनि गोल गर्नभने सकेन । इलामकी सोस्तिमा बिकले कम्तिमा पनि ६ पटक सम्म गोल गर्ने अवसर प्राप्त गरे पनि जाली चुमाउन भने सकेन् । उनका लागि दमका डिफेन्डर कमला श्रेष्ठ र गोल किपर शर्मिला मगर बाधक बनेका थिए ।
फाइनल प्रवेश गरेसँगै इलामले उपाधि भिडन्तमा कनकाई झापासँग भेट पक्का गरेको छ । फाइनल खेल भने फागुन २ गते हुनेछ ।
प्रतियोगितामा नेपाल र भारतका गरी कुल ८ टोली सहभागी थिए । प्रतियोगिताका विजेताले नगद तीन लाख एक सय ६९ सहित ट्रफी, मेडल र प्रमाणपत्र प्राप्त गर्ने छन् भने उपविजेताले नगद दुई लाख एक सय ६९ सहित ट्रफी, मेडल र प्रमाणपत्र पाउने छन् ।
प्रतियोगितामा आत्मापवित्र खेलकुद समिति र मुहिङगुम अङसीमामाङ साँबा पवित्रहाङमा लिङदेन ६९औं शुभजन्मोत्सव तथा मुहिङगुम अङसीमाङ लिङदेन आत्मानन्द ‘सेइङ’ नुमाङगेन्ना सेवा महासमारोह २०८१ को संयुक्त संयोजन र युथ अफ माङसेबुङको सह–संयोजन रहेको छ ।