कोलकाता उच्च अदालतले क्रिकेटर अभिषेक पोरेललाई पक्राउ गर्न र उनका इलेक्ट्रोनिक उपकरणहरू जफत गर्न पश्चिम बंगाल प्रहरीलाई आदेश दिएको छ ।
पोरेलमाथि एक मेडिकल छात्राले विवाहको झुटो आश्वासन दिएर यौन शोषण र बलात्कार गरेको आरोप लगाएकी छन् । न्यायाधीश सौगत भट्टाचार्यले पोरेललाई तुरुन्त पक्राउ गरी उनका फोन र अन्य उपकरणहरू नियन्त्रणमा लिन निर्देशन दिएका हुन् ।
अदालतले ती उपकरणहरूमा रहेका संवेदनशील डाटाहरू सार्वजनिक हुन नदिन यस्तो आदेश दिएको उल्लेख गरेको छ ।
पीडित छात्रा (मेडिकल तेस्रो वर्षमा अध्ययनरत) का अनुसार पोरेलसँग उनको भेट जनवरी २०२३ मा भएको थियो र उनीहरू अप्रिल २०२३ देखि नियमित सम्पर्कमा थिए । पोरेलले विवाह गर्ने वाचा गरेपछि दुवैका परिवारहरू समेत यसमा संलग्न थिए । तर, छात्राले गत अप्रिल २, २०२६ मा दिल्लीमा पोरेललाई भेट्न जाँदा आफूलाई यातना दिएको, अलग्याएको र खाना समेत नदिई बन्धक बनाएको आरोप लगाएकी छन् ।
उक्त घटनापछि उनलाई अस्पताल भर्ना हुनुपरेको थियो । पोरेलले उनीहरूका निजी तस्बिरहरू सार्वजनिक गरिदिने धम्की दिएको पनि छात्राले दाबी गरेकी छन् । प्रहरी कारबाहीको अवस्था हुगलीको मोगरा प्रहरी स्टेशनले यस मुद्दाको अनुसन्धान गरिरहेको छ ।
प्रहरीले अदालतलाई दिएको जानकारी अनुसार एउटा पेन ड्राइभ जफत गरी फरेन्सिक परीक्षणका लागि पठाइएको छ । यद्यपि, उच्च अदालतको आदेशका बावजुद क्रिकेटर पोरेल अझै फरार रहेका छन् ।
पीडितले प्रहरीले उचित कारबाही नगरेको भन्दै उच्च अदालतमा निवेदन दिएपछि अदालतले यस्तो कडा आदेश जारी गरेको हो । पीडितको गोपनीयता कायम राख्न सर्वोच्च अदालतको निर्देशिका अनुसार उनको परिचय खुलाइएको छैन ।