विश्व फुटबल महासंघ (फिफा) का रेफ्री प्रमुख पियरलुइजी कोलिनाले विश्वकपको अन्तिम १६ मा अर्जेन्टिनाले इजिप्टलाई ३-२ ले हराएको खेलमा रेफ्री पक्षपाती भएको इजिप्टको दाबी अस्वीकार गरेका छन् । उनले खेलका अधिकारीहरूले पूर्ण रूपमा स्वतन्त्र र निष्पक्ष रूपमा आफ्नो जिम्मेवारी निर्वाह गरेको बताएका छन् ।
फिफाको वेबसाइटमा बिहीबार प्रकाशित अन्तर्वार्तामा कोलिनाले रेफ्रीको निर्णयबारे आलोचना हुनु फुटबलको सामान्य पक्ष भए पनि रेफ्रीको इमान्दारिता र निष्पक्षतामाथि आधारहीन आरोप लगाउनु स्वीकार्य नहुने बताए । उनले यस्ता आरोपले रेफ्री र उनीहरूको परिवारसमेत धम्कीको जोखिममा पर्न सक्ने चेतावनी दिएका छन् ।
कोलिनाले फिफा विश्वकपका कुनै पनि रेफ्रीको इमान्दारितामाथि प्रश्न उठाउन नसकिने स्पष्ट पार्दै फिफाका अध्यक्ष जियानी इन्फान्टिनोसहित कसैले पनि रेफ्रीको निर्णयमा प्रभाव पार्न नसक्ने बताए ।
उक्त खेलमा इजिप्टले २-० को अग्रता बनाए पनि अर्जेन्टिनाले अन्तिम समयमा शानदार पुनरागमन गर्दै खेल ३-२ ले आफ्नो पक्षमा पारेको थियो । इन्जुरी समयमा एन्जो फर्नान्डेजले निर्णायक गोल गरेका थिए ।
त्यसपछि इजिप्टका मुख्य प्रशिक्षक होसाम हसनले अर्जेन्टिनालाई प्रतियोगितामा टिकाइराख्न रेफ्रीमाथि दबाब परेको हुन सक्ने आरोप लगाएका थिए । उनले आफ्नो टोली क्वार्टरफाइनल पुग्ने अवसरबाट बञ्चित भएको दाबी गरेका थिए । इजिप्ट फुटबल संघले पनि खेलमा भिडियो सहायक रेफ्री (भीएआर) को प्रयोगप्रति असन्तुष्टि जनाएको थियो ।
इजिप्टले मुख्य रूपमा दुई विषयमा गुनासो गरेको थियो । पहिलो, दोस्रो हाफमा मोस्तफा जिकोले गरेको गोललाई नभएको फाउलको आधारमा रद्द गरिएको दाबी थियो । तर, कोलिनाले भिडियो सहायक रेफ्री (भीएआर) ले गोल हुनुअघि मारवान अत्तियाले अर्जेन्टिनाका लिसान्द्रो मार्टिनेजमाथि फाउल गरेको सही रूपमा पहिचान गरेको बताए ।
उनका अनुसार रेफ्रीले मैदानमा नदेखेको फाउल भए पनि भीएआरले त्यसबारे हस्तक्षेप गर्न मिल्ने व्यवस्था छ । दोस्रो, अर्जेन्टिनाले विजयी गोल गर्नुअघि मोहम्मद सलाहमाथि भएको चुनौतीलाई पेनाल्टी दिनुपर्ने इजिप्टको दाबी थियो । तर, कोलिनाले रेफ्री र भीएआर दुवैले त्यसलाई सामान्य खेलको सम्पर्क मानेको बताए ।
उनले जुलियन आल्भारेजले पहिले बलमा खेलेर त्यसपछि भएको सामान्य सम्पर्क फाउल नमानिने स्पष्ट पारे । कोलिनाले केही रेफ्री निर्णयमा व्यक्तिगत मूल्याङ्कनको भूमिका रहने स्वीकार गरे पनि यस विश्वकपभर भीएआरको प्रयोगबाट फिफा सन्तुष्ट रहेको बताए ।