आईसीसी पुरुष टी-२० विश्वकप २०२६ को पहिलो सेमिफाइनल खेल आज न्युजिल्याण्ड र दक्षिण अफ्रिका भिड्दै छन् । खेल साँझ सवा ७ बजे कोलकातास्थित इडेन गार्डेनमा हुनेछ ।
दुवै टोलीबीचको यो प्रतिस्पर्धालाई निकै महत्त्वपूर्ण मानिएको छ, जहाँ दक्षिण अफ्रिकाको ब्याटिङ पक्ष बलियो देखिएको छ भने न्युजिल्याण्डले रणनीतिमा विशेष ध्यान दिनुपर्ने अवस्था रहेको विश्लेषण गरिएको छ ।
यसअघि समूह चरणमा भएको भेटमा दक्षिण अफ्रिकाले न्युजिल्याण्डलाई सीमित योगफलमा रोक्दै लक्ष्य सहज रूपमा पछ्याएको थियो ।
त्यस खेलमा दक्षिण अफ्रिकाले १७६ रनको लक्ष्य सजिलै पूरा गरेको थियो । दक्षिण अफ्रिकाका कप्तान एडेन मार्कराम उत्कृष्ट लयमा रहेका छन् । उनलाई रोक्न न्युजिल्याण्डका बलरलाई चुनौतीपूर्ण हुने देखिएको छ ।
क्विन्टन डी कक, रायन रिकेल्टन र डेविड मिलर जस्ता ब्याटरहरूले पनि टोलीको ब्याटिङलाई मजबुत बनाएका छन् ।
न्युजिल्याण्डका तीव्र गतिका बलर लोकी फर्गुसनले भने डी ककविरुद्ध अघिल्ला खेलहरूमा केही सफलता पाएका छन् । त्यसैले उनलाई सुरुआती ओभरमा प्रयोग गर्ने सम्भावना रहेको छ । साथै, टोलीले बलिङ संयोजनमा परिवर्तन गर्दै नयाँ विकल्प प्रयोग गर्न सक्ने सङ्केत पनि देखिएको छ ।
कोलकाताको मैदान लक्ष्य पछ्याउने टोलीका लागि अनुकूल मानिन्छ । त्यसैले टस जित्ने टोलीले पहिले फिल्डिङ रोज्ने सम्भावना बढी छ ।
न्युजिल्याण्डका लागि टस जित्नु खेलको परिणाममा महत्त्वपूर्ण बन्न सक्ने अनुमान गरिएको छ । यता दक्षिण अफ्रिकाले भने अघिल्लो खेलमा अपनाएको रणनीति नै दोहोर्याउने तयारी गरेको छ ।
सुरुआती ओभरमा तीव्र बलिङ, मध्य ओभरमा नियन्त्रण र अन्तिम ओभरमा कडा बलिङ गर्दै खेल आफ्नो पक्षमा पार्ने लक्ष्य टोलीको रहेको छ ।