जावलाखेल । ललितपुर महानगरपालिकाको १०६औं वार्षिकोत्सब अवसरमा आयोजित अन्तरपालिका मेयर कप महिला तथा पुरुष भलिबल प्रतियोगिताको फाइनल समीकरण पूरा भएको छ।
बुधबार सेमिफाइनलका खेल सम्पन्न भएसँगै उपाधिका लागि भिड्ने टोलीको टुंगो लागेको हो ।
जावलाखेल भलिबल प्रशिक्षण केन्द्र कभर्डहल जावलाखेलमा जारी प्रतियोगितामा महिलातर्फ निलकण्ठ नगरपालिकाले आयोजक ललितपुर महानगरपालिका तथा महालक्ष्मी नगरपालिकाले बिगु गाउँपालिकालाई हराउँदै उपाधि नजिक पुगेका हुन्।
निलकण्ठले ललितपुरलाई २५-२० २५-२१ र ३३-३१ को सेटमा पराजित गर्यो । अर्को सेमिफाइनलमा महालक्ष्मीले बिगुलाई २५-२०, २५-१९ र २५-११ को सेटमा हरायो।
उपाधिका लागि अब महालक्ष्मी र निलकण्ठ भोलि बिहान १० बजे खेल्ने छन् भने सेमिफाइनलमा पराजित ललितपुर र बिगुले तेस्रो स्थानका लागि बिहान ८ बजे प्रतिस्पर्धा गर्नेछन् ।
यता, पुरुषतर्फ उपाधिका लागि आयोजक ललितपुरले महाङकालको सामना गर्नेछ। फाइनल खेल दिउँसो २ बजे हुनेछ।
ललितपुरले मन्थली ए लाई २५-१६, २५–२१, २०-२५ तथा २५-१९ ले हराउँदै उपाधि नजिक पुगेको हो । अर्को सेमिफाइनलमा मेलुङ गाउँपालिकालाई ३-० को सोझो सेटमा हराउँदै महाङकाल उपाधि नजिक पुग्यो । पहिलो सेट २५-१५, दोस्रो सेट २५-९ र तेस्रो सेट २५-१९ ले आफ्नो पक्ष्यमा पार्यो ।
सेमिफाइनलमा पराजित मन्थली ए र मेलुङले तेस्रो स्थानको लागि बिहवार दिउँसो १२:१५ बजे प्रतिस्पर्धा गर्नेछ ।
प्रतियोगिताको विजेताले दुवैतर्फ दुई लाख पाउनेछन् । उपविजेता एक लाख, तेस्रो हुनेले ५० हजार पाउनेछन् । जारी प्रतियोगितामा महिलातर्फ ८ टिमको सहभागिता रहेको थियो भने पुरुषतर्फ १४ टिमको सहभागि थिए ।
प्रतियोगितामा बिधागततर्फ सर्वोत्कृष्ट खेलाडीले १० हजार, वेस्ट स्पाईकर, वेस्ट ब्लकर, वेस्ट लिबेरो र वेस्ट प्रशिक्षकले समान ५ हजार पाउनेछन् ।