काठमाडौं । इन्डोर सुपर लिग सिजन–२ को फ्रेन्चाइज टोली जनकपुर किंग्सले नेपालकै अग्रणी मोटरसाईकल कम्पनी बजाज पल्सरसँग मुख्य प्रायोजकको लागि सम्झौता गरेको छ । जनकपुर किंग्स र बजाज पल्सरबीचको सम्झौता नक्साल, गैरीधारास्थित बजाज पल्सरको कार्यालयमा आज सम्पन्न भएको हो ।
सम्झौतापछि जनकपुर किंग्सका प्रमुख कार्यकारी अधिकृत आर्यन शाहले बजाज पल्सरसँग सहकार्य गर्न पाउनु टिमका लागि गर्वको विषय भएको बताएका छन् । उनले यो साझेदारीले टिमलाई थप ऊर्जा, आत्मविश्वास र प्रेरणा प्रदान गर्ने विश्वास व्यक्त गरे ।
“जनकपुर किंग्सको यात्रामा बजाज पल्सरजस्तो प्रतिष्ठित ब्रान्डसँग जोडिन पाउनु हाम्रो लागि गर्वको विषय हो । यो साझेदारीले हाम्रो टिमलाई थप ऊर्जा, आत्मविश्वास र प्रेरणा दिएको छ,” शाहले भने ।
उनले इन्डोर क्रिकेटलाई नयाँ उचाइमा पुर्याउने अभियानमा बजाज पल्सरको साथ महत्वपूर्ण रहने उल्लेख गर्दै आगामी दिनमा दुवै पक्षले सहकार्य गर्दै उत्कृष्ट काम गर्ने बताए । साथै, यस साझेदारीमार्फत दर्शक तथा क्रिकेटप्रेमीलाई अझ उत्कृष्ट अनुभव प्रदान गर्ने लक्ष्य रहेको शाहको भनाइ छ ।
त्यस्तै, बजाज पल्सरको सेल्स एण्ड मार्केटिङ विभागका राजेश पोखरेलले जनकपुर किंग्ससँग सहकार्य गर्न पाउँदा खुसी व्यक्त गरे । उनले नेपालमा क्रिकेटको लोकप्रियता मैदानमा मात्र नभई इन्डोर स्वरूपमा समेत बढ्दै जानु सकारात्मक पक्ष भएको बताए । उनले नेपालमा क्रिकेटप्रतिको आकर्षण बढ्दै गएको अवस्थामा इन्डोर क्रिकेटले समेत छुट्टै पहिचान बनाउन थालेको बताए ।
“जनकपुर किंग्ससँग हातेमालो गर्न पाउँदा हामी निकै खुसी छौं । नेपालमा क्रिकेटप्रतिको आकर्षण दिनप्रतिदिन बढिरहेको छ र अब इन्डोर क्रिकेटले पनि आफ्नो छुट्टै पहिचान बनाउँदै गएको देख्दा उत्साहित छु,” पोखरेलले भने ।
उनले खेलकुद र युवासँग जोडिने अभियानमा बजाज पल्सर सधैं सकारात्मक रहँदै आएको उल्लेख गर्दै जनकपुर किंग्ससँगको सहकार्य पनि सोही यात्राको महत्वपूर्ण हिस्सा भएको बताए । साथै, उनले जनकपुर किंग्सको सफलताको शुभकामना दिँदै आगामी दिनमा अझ प्रभावकारी र दीर्घकालीन सहकार्य गर्ने अपेक्षा व्यक्त गरे ।
बजाज पल्सरसँगको सम्झौताले जनकपुर किंग्सको सिजन–२ को तयारीलाई थप मजबुत बनाएको छ । इन्डोर सुपर लिग सिजन–२ आगामी भदौ २२ देखि भदौ २८ गतेसम्म आयोजना हुँदैछ ।