कालाबन्जर । सुनसरीको कालाबन्जरमा जारी आठौं अन्तर्राष्ट्रिय भरौल गोल्डकप फुटबल प्रतियोगितामा नेपाल पुलिस क्लब काठमाडौं सेमिफाइनलमा प्रवेश गरेको छ ।
मंगलबार भएको चौथो तथा अन्तिम क्वाटरफाइनल खेलमा सप्तरीको नमो बुद्ध युथ क्लबलाई ३–० ले हराउँदै पुलिस अन्तिम चारमा प्रवेश गरेको हो ।
वराहक्षेत्र-५ कालाबन्जरस्थित श्री भरौल जडेज खेल मैदानमा भएको खेलमा पुलिसलाई जित दिलाउन बिकास बिक, विवेक पाण्डे र प्रज्वल चौधरीले गोल गरे ।
खेलको म्यान अफ द म्याच पुलिसका प्रविण थापा घोषित भए । उनले ट्रफीसहित नगद ५ हजार रुपैयाँ प्राप्त गरे ।
प्रतियोगिता अन्तर्गत बुधबारको पहिलो सेमिफाइनल खेल द योङ ब्रदर्श क्लब इटहरी र हनामी भरतपुर फुटबल क्लब चितवनबीच प्रतिस्पर्धा हुनेछ ।
चैत्र ९ गतेसम्म चल्ने प्रतियोगितामा कुल आठ टोली सहभागी छन् । न्यु स्टार क्लबको आयोजनामा जारी प्रतियोगिताको विजेता टोलीलाई नगद ४ लाख रुपैयाँ तथा उपविजेता हुने टोलीलाई २ लाख रुपैयाँसहित नगद, ट्रफी, मेडल र प्रमाणपत्र प्रदान गरिने गरिनेछ ।
प्रतियोगिता अवधिमा उत्कृष्ट खेलप्रदर्शन गर्ने सर्वोत्कृष्ट खेलाडीलाई नगद २५ हजार रुपैयाँसहित ट्रफी, प्रमाणपत्र तथा विद्यागत उत्कृष्ट गोलरक्षक, उत्कृष्ट रक्षक, उत्कृष्ट मिडफिल्डर, उत्कृष्ट फरवार्ड र सार्वधिक गोलकर्तालाई जनही १०-१० हजार रुपैयाँका दरले पुरस्कृत गरिनेछ ।