सहिद स्मारक ‘सी’ डिभिजन लिगमा बिहीबार महावीर क्लबले झम्सिखेल युवा क्लबविरुद्ध ३-१ को सहज जित निकालेको छ ।
सातदोबाटोस्थित एन्फा मुख्यालयमा महावीरलाई जित दिलाउन निरबहादुर थापा, अनिश शर्मा र दीपकबहादुर श्रेष्ठले गोल गरे । झम्सिखेलका लागि ओम धामीले एक गोल फर्काए
जितसँगै १२ खेलमा १३ अंक जोडेको महावीर ११औं स्थानमा छ । पराजित झम्सिखेल समान खेलबाट १६ अंकका साथ सातौं स्थानमा छ ।
खेलको १४औं मिनेटमा निरबहादुरको गोलमार्फत महावीरले अग्रता लियो । ३८औं मिनेटमा अनिशले टोलीको अग्रता दोब्बर बनाए ।
पहिलो हाफ सकिन एक मिनेट बाँकी छँदा दीपकले महावीरका लागि तेस्रो गोल गरे । ८५औं मिनेटमा ओमले गरेको गोल झम्सिखेलका लागि सान्त्वना बन्यो ।