आरोहण शर्मा फुयाल, विराटनगर
आठौं नम्बरमा ब्याटिङ गर्न आएका नितिशले अस्ट्रेलियाली बलरहरूको धज्जी उडाउँदै आफ्नो टीमलाई संकटबाट बाहिर मात्र ल्याएनन्, आफ्नो करियरको पहिलो टेस्ट शतक पनि प्रहार गरे । २१ वर्षको उमेरमै यस्तो धमाकेदार प्रदर्शन गर्दै उनले क्रिकेट दुनियाँमा नयाँ पहिचान बनाए ।
नितीशलाई यो स्थानसम्म पुर्याउन उनका पिताको बलिदान विशेष महत्वको छ । आन्ध्र प्रदेशका निवासी उनका पिता मुत्याला रेड्डी आफ्नो छोराको सपना पूरा गर्नका लागि कुनै कसर बाँकी राखेनन् । उनी भारतको हिन्दुस्तान जिंक कम्पनीमा काम गर्थे । तर, जब नितिश १० वर्षको उमेरमा उदयपुरमा सरे, तब उनको क्रिकेट यात्रामा अवरोध नहोस् भनेर उनका पिताले सरकारी जागिर नै त्यागिदिए ।
उनी आफ्नो छोरालाई क्रिकेटमा सफल बनाउन दिनरात परिश्रम गर्न थाले । समाजका ताना-बाना र आर्थिक चुनौतीहरूका बाबजुद पनि उनले कहिले हार मानेनन् । उनको यो त्याग र लगनले नै नितीशलाई अन्तर्राष्ट्रिय स्तरको खेलाडी बनायो ।
मेलबर्नको मैदानमा जब नितीशले आफ्नो शतक पूरा गरे, उनका पिताको आँखाबाट खुशीका आँसु झरे । भावविह्वल हुँदै उनले भने, “नितिशले शतक बनाएर मेरो जीवनको सबैभन्दा ठूलो सपना पूरा गरिदिएको छ । यो भावना शब्दमा व्यक्त गर्न कठिन छ ।” नितीशकी आमा र पत्नी पनि त्यहाँ उपस्थित थिए, र त्यो क्षण सम्पूर्ण परिवारका लागि अविस्मरणीय रह्यो ।
मेलबर्न टेस्टमा अझै दुई दिनको खेल बाँकी छ । भारतलाई अस्ट्रेलियाको ११६ रनको अग्रतालाई चुनौती दिन बाँकी छ । अन्तिम विकेटका रूपमा नितीश र मोहम्मद सिराज क्रिजमा छन् । चौंथो दिनको खेल निर्णायक हुने अपेक्षा गरिएको छ ।