कोशी पाथिभरा इन्डो नेपाल टि-२० क्रिकेट प्रतियोगिताको उद्घाटन खेलमा भारतको राइनोल्यान्ड क्रिकेट एकाडेमी आसामले विजयी सुरुवात गरेको छ ।
मेची क्रिकेट मैदान भद्रपुरमा आज भएको खेलमा आसामले जिएचसिए काठमाडौँलाई ४२ रनले पराजित गरेको हो । पहिलो ब्याटिङ गर्दै आसामले १८.१ ओभरमा अलआउट हुँदै ९६ रन बनाएको थियो ।
जवाफी ब्याटिङमा आएको काठमाडौँ १६.२ ओभारमा ५४ रनमा अलआउट भएपछि आसामले महत्वपूर्ण ३ अंक जोडेको छ ।
आसामका तर्फबाट मोहमद हबिबुल्लाले सर्वाधिक १९ रन बनाए । काठमाडौँका तर्फबाट रुपेश श्रीवास्तवले ४ ओभरमा १६ रन खर्चिएर ३ विकेट लिए । त्यस्तै, काठमाडौँका तर्फबाट उनले सर्वाधिक १४ रन बनाए । आसामका तर्फबाट प्राञ्जल भरालीले ४ ओभरमा ९ रन खर्चिएर ३ विकेट लिए ।
प्रतियोगिताको एक समारोहका बीच कोशी प्रदेशका मुख्यमन्त्री हिक्मतकुमार कार्कीले उद्घाटन गरेका थिए ।
भद्रपुर क्रिकेट क्लवका अध्यक्ष आदित्य पराजुलीको अध्यक्षतामा आयोजित उद्घाटन समारोहलाई सम्बोधन गर्दै प्रमुख अतिथि मुख्यमन्त्री कार्कीले खेलकुद क्षेत्रलाई अघि बढाउन कोशी प्रदेश सरकार प्रतिबद्ध रहेको बताए ।
उनले मेची क्याम्पसको क्रिकेट मैदानलाई थप विकसित गर्न कोशी प्रदेश सरकारले लगानी गर्ने बताए । संघका सचिव केदार महतले सञ्चालन र प्रतियोगिताका संयोजक तथा भद्रपुर नगरपालिका वडा नम्बर ८ का वडा अध्यक्ष गौरव सुब्बाले स्वागतसहित औचित्यमाथि प्रकाश पारेका थिए ।
प्रतियोगितामा नेपालका ४ र भारतका ४ गरी ८ वटा टिमको सहभागिता रहेको छ । टिमलाई २ समूहमा विभाजन गरिएको छ ।
अंकका आधारमा सेमिफाइनल खेल्ने टिमको टुंगो लाग्ने आयोजक भद्रपुर क्रिकेट क्लवका महासचिव वसन्त पोखरेलले जानकारी दिए ।