विश्व स्क्वास वरीयतामा पाँचौं स्थानमा रहिसकेका बोर्खा गोलानले नेपाली खेलाडीलाई प्रशिक्षण दिने भएका छन् ।
नेपाल स्क्वास एन्ड किट्स संघले सोमबार एक कार्यक्रमको आयोजना गर्दै स्पेनका लेभल थ्री प्रशिक्षक गोलानलाई स्वागत गरेको छ । गोलानले एक हप्ता नेपाली स्क्वास खेलाडीलाई प्रशिक्षण दिनेछन् ।
सन् २०१४ मा गोलान विश्व स्क्वास वरीयताको पाँचौं स्थानमा थिए । उनले पिएसए विश्व टुरमा ३३ उपाधि जितेका छन् । यसैगरी उनी १७पटकको स्पेनका राष्ट्रिय च्याम्पियन पनि हुन् ।
दुई पटक युरोपेली इन्डिभजुयल च्याम्पियन रहिसकेका गोलानले स्पेनको राष्ट्रिय टिमलाई विभिन्न अन्तर्राष्ट्रिय प्रतियोगतामा नेतृत्व पनि गरेका छन् ।
सन् २०२३ मा गोलानले खेलाडी जीवनबाट सन्यास लिएका थिए। त्यसपछि उनले गोलान स्क्वास एकेडेमीको स्थापना गरे । जुन एकेडेमीले युवा खेलाडी उत्पादन र सहयोग गर्ने गर्दछ ।
सोही एकेडेमीमा नेपालका स्क्वास खेलाडी अमृत थापा मगर पनि प्रशिक्षणमा छन् । ४२ वर्षीय प्रशिक्षक गोलानले नेपालको बारेमा धेरै सुनेको बताउँदै आफूले नेपाली स्क्वास खेलाडीलाई थप उत्प्रेरित गर्ने लक्ष्यसहित नेपाल आएको बताएका छन् ।
‘पछिल्ला दुई-तीन वर्षदेखि प्रशिक्षकको जिम्मेवारीमा छु, नेपालमा सिकाउने मात्र होइन, मैले पनि धेरै सिक्ने अवसर पाउनेछु’ उनले भने ।
नेपाल स्क्वास एन्ड राकेट्स संघका अध्यक्ष धुरबबहादुर गुरुङले गोलानको प्रशिक्षणले नेपाली स्क्वास खेलाडीको स्तर अझ राम्रो हुने भनाई राखेका छन् ।
उनले गोलान स्क्वास फाउन्डेसनबाट युरोपका स्तरीय खेलाडीसँग अनुभव दिन नेपाली खेलाडीहरुलाई स्क्वास टुरको व्यवस्था गर्न पनि अनुरोध गरे ।
ललितपुर जिल्ला खेलकुद विकास समितिका अध्यक्ष विनोद महर्जनले गोलानको आगमन नेपालका स्क्वास खेलाडीहरुका लागि आफ्नो खेल स्तर बढाउने ठूलो अवसर भएको बताए । उनले हेटौंडामा सक्वास कोर्ट बनाउने योजना सामेल प्रपोजको कार्य अगाडि बढेको जानकारी दिए ।
यसैगरी नेपाल स्क्वास एन्ड यकिट्स संघका निवर्तमान अध्यक्ष किशोर महर्जनले गोलानबाट खेलाडीहरु मात्र होईन नेपाली प्रशिक्षकहरुले पनि धेरै कुरा सिक्ने अपेक्षा गरेका छन् ।