काठमाडौँ । ट्रेलमाण्डुले शनिबार ‘फ्लड रिलिफ १० के ट्रेल रनको आयोजना गर्ने भएको छ । ट्रेलमाण्डुका संस्थापक तथा अल्ट्रा रनर रसिला तामाङको संयोजकत्वमा भोटोकोशी क्षेत्रमा आएको बाढीबाट पिडितहरुको सहयोगार्थ यो ट्रेल रनको आयोजना हुन लागेको हो ।
संयोजक रसिलाले स्वेदशी र विदेशी गरी ३० भन्दा बढी अल्ट्रा रनरले फ्लड रिलिफ ट्रेल रनमा दर्ता गरिसकेको जानकारी दिए । स्वयम्भूबाट सुरु हुने सो दौड इचंगु, सेतो गुम्बा भएर पुनः इचंगुबाट सुरु भएको स्थानमा फर्किनेछ ।
रसिला यस दौडबाट संकलित सम्पूर्ण रकम प्रधानमन्त्री दैवी प्रकोप उद्धार कोषमा जम्मा गर्ने जानकरी दिइन् । उनले केही दिनअघि मात्र स्विट्जरल्यान्डको ग्राचेन र फ्रान्सको ला ग्रेभमा दुई महिना प्रशिक्षण लिएर नेपाल फर्किएकी हुन् । प्रशिक्षणककै समयमा रसिला फ्रान्समा अल्ट्रा रेस प्रतियोगितामा सहभागी पनि गरेकी थिइन् । सोही रेसकै दौरान जुनिपर ट्रस्टसँगको सहकार्यमा रसिलाले एक लाख रुपियाँ बाढीपिडितका लागि सहयोग गरिन् ।
पछिल्ला दुई वर्षदेखि जुनिपर ट्रस्टसँग मिलेर रसिलाले जलवायु परिवर्तनमा पनि काम गरिरहेको छ । एसिया ट्रायल मास्टर्स जित्ने नेपालकी पहिलो अल्ट्रा धाविका रसिलाले सो ट्रस्टसँग मिलेर पाँच हजार रुख रोप्ने कार्य पनि गरेकी थिइन् ।