विश्वकप २०२६ को फाइनलपछि देखिएको विवादास्पद घटनालाई लिएर फिफाले अर्जेन्टिनाविरुद्ध औपचारिक अनुशासनात्मक कारबाही प्रक्रिया अघि बढाएको छ ।
स्पेनसँग १-० ले पराजित भएको फाइनल खेलपछि अर्जेन्टिनाका केही खेलाडी र टोलीका अधिकारी स्पेनका खेलाडीसँग विवादमा उत्रिएका थिए ।
सो घटनाको छानबिनका लागि फिफाले गत साता अनुशासन तथा आचारसंहिता अभियोजक नियुक्त गरेको थियो ।
अभियोजकको सिफारिसका आधारमा फिफाले अर्जेन्टिनाका नाहुएल मोलिना, लिआन्द्रो परेडेस र सहायक प्रशिक्षक रोबर्टो आयालामाथि अनुशासनात्मक अनुसन्धान सुरु गरेको हो ।
मोलिनामाथि दुई तथा परेडेसमाथि तीन वटा कथित कुटपिटसम्बन्धी आरोप लगाइएको छ भने आयालामाथि एक आरोप लागेको छ ।
मोलिनामाथि अस्वस्थ खेल व्यवहार सम्बन्धी थप आरोप पनि लगाइएको छ। अर्जेन्टिनाका थियागो आल्माडा र स्पेनका मिडफिल्डर गाभीमाथि पनि सोही प्रकृतिको आरोप लागेको फिफाले जनाएको छ ।
फिफाको अनुशासन संहिताअनुसार अस्वस्थ खेल व्यवहार पुष्टि भए कम्तीमा एक खेलको प्रतिबन्ध र कुटपिटको आरोप प्रमाणित भए कम्तीमा तीन खेलको प्रतिबन्ध हुन सक्ने व्यवस्था छ ।
यस्तै, अर्जेन्टिना फुटबल संघविरुद्ध पनि प्रतियोगिताका विभिन्न खेलमा भएका सम्भावित नियम उल्लंघनबारे छुट्टै अनुशासनात्मक प्रक्रिया अघि बढाइएको छ । खेलकुदबाहेकका राजनीतिक प्रदर्शन, टोलीको अनुशासनहीन व्यवहार, विभेद तथा जातीय दुर्व्यवहार, साथै खेलको सुरक्षा र व्यवस्थासम्बन्धी नियम उल्लंघनको विषयमा अनुसन्धान भइरहेको फिफाले जनाएको छ ।
अनुसन्धानको दायरामा विभेदपूर्ण नारा र हाउभाउ, खेल ढिलो सुरु भएको, टोली र समर्थकले अनुपयुक्त सन्देश प्रदर्शन गरेको तथा दर्शकले मैदानमा वस्तु प्रहार गरेका घटनासमेत रहेका छन् ।
यसअघि इङ्ग्ल्यान्डविरुद्धको सेमिफाइनल जितपछि अर्जेन्टिनाका खेलाडीहरूले ‘फकल्यान्ड टापु अर्जेन्टिनाकै हो’ भन्ने सन्देशसहितको ब्यानर प्रदर्शन गरेका थिए । त्यो घटनाबारे पनि फिफाले अनुसन्धान गरिरहेको छ ।