काठमाडौं । एचएचसीए र विल्सन एकेडेमीले जोन डेवी कप अन्तरविद्यालय बास्केटबल तथा फुटसल प्रतियोगिताअन्तर्गत ब्वाइज बास्केटबलमा सोमबार जित हात पारेका छन् ।
एचएचसीएले आयोजक जोन डेवीलाई ५१–३८ ले पराजित गर्यो । एचएचसीएको जितमा गणेश मगरले १२ अंक योगदान गरे । रेहान डंगोलको १८ अंक सहयोगमा विल्सनले एभरेष्टलाई ४७–३३ ले हरायो ।
न्युटनले मिल्सबेरीलाई ६०–४३ तथा मातृभूमिले जेभियरलाई ६४–४७ ले पाखा लगाए । न्युटनका सविन राईले २१ तथा मातृभूमिका आभास राउतले १६ अंक बटुले ।
गर्ल्समा मातृभूमिले मिल्सबेरीलाई ४४–३२, न्युटनले द एक्सेल्सियर स्कुललाई २६–१६, ल्यान्डमार्क एकेडेमीले युरो स्कुल, छाउनीलाई २१–१२, सत्य साइले हिमरश्मिलाई २४–१६ र डिफेन्डिङ च्याम्पियन बौद्ध चिल्ड्रेन हेभेनले राई स्कुललाई २२–१२ ले पन्छाए ।
मातृभूमिकी समाइराह श्रेष्ठले १३, न्युटनकी आईरीन रानाले २१, ल्यान्डमार्ककी प्रतीक्षा राईले ९, सत्य साइकी मिस्टी श्रेष्ठले ८ र बौद्धकी जस्मिन गुरुङले ७ स्कोर गरे ।
फुटसल: जोन डेवी र काष्ठमण्डप क्वाटरफाइनलमा
प्रतियोगिताअन्तर्गत यु–१२ ब्वाइज फुटसलमा आयोजक जोन डेवी ‘ए’ र काष्ठमण्डप विद्यालय क्वाटरफाइनला प्रवेश गरेका छन् ।
समूह चरणको पहिलो खेलमा जोन डेवी ‘ए’ ले बृहस्पति विद्या सदनलाई १–० गोलले पराजित गर्यो । प्रणाम भण्डारीले निर्णायक गोल गरे । अर्को खेलमा जोन डेवी ‘ए’ ले श्रृष्टि एकेडेमीलाई ४–१ गोलले हरायो ।
विजेताका प्रणाम भण्डारीले २ तथा रेनभकुमार मल्ल र शुभवीर ब्लोनले समान १–१ गोल गरे । श्रृष्टिका संस्कार मैनालीले सान्त्वना गोल गरे । काष्ठमण्डपले एआईएलाई १–० गोलले पाखा लगायो।
अधिराज श्रेष्ठले निर्णायक गोल गरे । अर्कोमा काष्ठमण्डपले लाइफ स्कुललाई ४–१ ले पन्छायो । काष्ठमण्डपका रुक्म, सायन, सिद्धान्त र युयुधनले गोल गरे । लाइफका अस्टिनले १ गोल फर्काए।
त्यसअघि काष्ठमण्डपले एनबीएफएमाथि ३–० को जित दर्ता गरेको थियो । सोही स्पर्धामा राई स्कुल, चेल्सी वर्ल्ड स्कुल, डाफोडिल, द एक्सेल्सियर स्कुल, लाइफ र बृहस्पति विद्या सदनले सफलता पाए ।