थाइल्यान्डमा शुक्रबारदेखि शुरु हुने आईसिसी महिला टि-२० विश्वकप एसिया छनोटको आफ्नो पहिलो खेलमा नेपालले भोलि हङकङसँग प्रतिस्पर्धा गर्दैछ ।
खेल नेपाली समयअनुसार बिहान ८:४५ बजे थाइल्यान्डको एसियन टेक्नोलोजी मैदानमा हुने छ ।
विश्वकप छनोट मे ९ देखि २० सम्म हुँदैछ । नेपाल रहेको समूह ‘सी’ मा बहराइन र हङकङ छन् । यस्तै, नेपालले १० मेमा बहराइन र १३ मेमा हङकङसँग पुन: खेल्नेछ । १५ मेमा बहराइनसँग अर्को खेल खेल्दै नेपालले लिगचरण सक्काउने छ ।
९ राष्ट्रको सहभागिता रहने छनोट प्रतियोगितामा सहभागी टोलीलाई ३ समूहमा विभाजन गरिएको छ । समूह चरणमा डबल राउण्ड रोविनमा खेल हुनेछ । तीनवटै समूहको शीर्ष स्थानमा रहने टोली सुपर राउण्डमा पुग्नेछ । त्यसबाट शीर्ष दुई टोली ग्लोबल क्वालिफायरमा पुग्नेछन् ।
प्रतियोगितामा घरेलु टोली थाइल्याण्डसहित नेपाल, हङकङ, बहराइन, भुटान, कुवेत, मलेसिया, कतार र यूएईले प्रतिस्पर्धा गर्नेछन् ।
नेपाली टोली भारतको नयाँ दिल्लीमा अभ्यास खेल खेलेर सिधै विश्वकप छनोटका लागि थाइल्यान्ड पुगेको हो ।
नेपाली टोली
इन्दु बर्मा (कप्तान), रुविना क्षेत्री, कविता कुँवर, विन्दु रावल, पूजा महतो (उपकप्तान), रोमा थापा, रुवि पोदार, सबनम राई, कविता जोशी, ईश्वरी विष्ट, सम्झना खड्का, मनिषा उपाध्याय, राजमति ऐरी, रिया शर्मा