काठमाडौं । नेपाल खेलकुद पत्रकार मञ्चको आयोजनामा हरेक हुँदै आएको एनएसजेएफ कप फुटसल प्रतियोगिताको तेश्रो संस्करणको उपाधि रिपोर्टर राइनोजले जितेको छ ।
नखिपोटस्थिट फुटसल भिजेलमा बिहीबार भएको फाइनलमा रिपोर्टर राइनोजले हेडलाइन हुरिकेन्सलाई ४-० ले पराजित गर्दै उपाधि जितेको हो । राइनोजको जितमा सबै गोल टिमका मार्की अभिनव जोशीले गरे ।
चार टिम प्रतिस्पर्धी एनएसजेएफ कपमा रिपोर्टर, हेडलाइन र बाइलाइन ब्यान्डिजले समान २ खेल जितेका थिए । बाइलाइनलाई गोलअन्तरमा पछि पार्दै सुवास हुमागाईं मार्की रहेको हेडलाइनले फाइनल पक्का गरेको थियो ।
रिपोर्टरले लिग चरणमा पनि हेडलाइनलाई ५-२ ले हराएको थियो । अन्तिम लिग खेलमा बाइलाइनसँग हारे पनि रिपोर्टर पुगेको हो । फिचर फ्यान्टमसले तीनै खेलमा पराजय भोगेको थियो ।
अभिनव कुल ११ गोल गर्दै उत्कृष्ट खेलाडी बने । इमर्जिङ प्लेयरमा शिशिर बस्नेत र उत्कृष्ट गोलरक्षकमा हेडलाइनका सुजल थापा चुनिए । विजेता टिम तथा खेलाडीलाई एन्फाका प्रवक्ता सुरेश शाह र फुटसल भिजेलका प्रोप्राइटर थमन भुसालले ट्रफी प्रदान गरेका थिए ।