नेपाल कबड्डी लिग (एनकेएल) मा हिमालयन रेडर्सले पहिलो जित हासिल गरेको छ ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा आइतबारको दोस्रो तथा अन्तिम खेलमा पोखरा लेकर्सलाई हिमालयन रेडर्सले ३४-३० अंकले पराजित गरेको हो ।
खेलमा हिमालयन दुई पटक अल आउट भएको थियो भने पोखरा एक पटक अल आउट भयो । पहिलो हाफमा १३-११ ले अग्रता बनाएको हिमालयनले उक्त अग्रतालाई जोगाउँदै खेलमा जित हासिल गर्यो ।
जितसँगै दुई खेलमा पाँच अंक जोडेको हिमालयन तेस्रो स्थानमा छ । लगातार दोस्रो हार बेहोरेको पोखराको दुई अंकका साथ पाँचौं स्थानमा छ ।
यसअघि पहिलो खेलमा पोखरा काठमाडौँसँग पराजित भएको थियो । यता, हिमालयन जनकपुरसँग पराजित भएको थियो ।